ಪೋಲಿಯೊದ ಕರಾಳ ಮುಖ – ಒಂದು ಮೌನ ಹಂತಕನ ಪರಿಚಯ
ವಿಶ್ವದ ಆರೋಗ್ಯ
ಇತಿಹಾಸದಲ್ಲಿ 'ಪೋಲಿಯೊ' ಎಂಬ ಪದವನ್ನು ಕೇಳಿದಾಗಲೆಲ್ಲಾ ಒಂದು
ರೀತಿಯ ನಡುಕ ಹುಟ್ಟಿಕೊಳ್ಳುತ್ತದೆ. ಇದೊಂದು ವೈರಸ್ ಜನ್ಯ ಕಾಯಿಲೆಯಾಗಿದ್ದು, ಮಾನವನ ನರಮಂಡಲದ ಮೇಲೆ ನೇರವಾದ ದಾಳಿ ನಡೆಸುತ್ತದೆ. ಮಗುವಿನ ಭವಿಷ್ಯವನ್ನೇ ಕತ್ತಲಲ್ಲಿ
ತಳ್ಳುವ ಈ ವೈರಸ್, ಮಾನವಕುಲದ ಪಾಲಿಗೆ ದಶಕಗಳ ಕಾಲ ಮೌನ
ಹಂತಕನಾಗಿತ್ತು. ಪೋಲಿಯೊ ವೈರಸ್ (Poliovirus) ಸಾಮಾನ್ಯವಾಗಿ ಕಲುಷಿತ ನೀರು
ಮತ್ತು ಆಹಾರದ ಮೂಲಕ ಮನುಷ್ಯನ ದೇಹವನ್ನು ಪ್ರವೇಶಿಸುತ್ತದೆ. ಒಮ್ಮೆ ದೇಹ ಸೇರಿದರೆ, ಇದು ಕರುಳಿನಲ್ಲಿ ಸಂತಾನೋತ್ಪತ್ತಿ ಮಾಡಿ ರಕ್ತದ ಮೂಲಕ ಬೆನ್ನುಮೂಳೆಯ ನರಗಳಿಗೆ
ತಲುಪುತ್ತದೆ. ಅಲ್ಲಿನ ಕೋಶಗಳನ್ನು ನಾಶಪಡಿಸುವುದರಿಂದಲೇ ವ್ಯಕ್ತಿಗೆ ಪಾರ್ಶ್ವವಾಯು (Paralysis)
ಉಂಟಾಗುತ್ತದೆ. ಅಚ್ಚರಿಯ ಸಂಗತಿಯೆಂದರೆ, ಹತ್ತು ಜನ
ಸೋಂಕಿತರಲ್ಲಿ ಒಂಬತ್ತು ಜನರಿಗೆ ರೋಗದ ಲಕ್ಷಣಗಳೇ ಕಾಣಿಸಿಕೊಳ್ಳುವುದಿಲ್ಲ, ಆದರೆ ಅವರು ವೈರಸ್ ಹರಡುವ ವಾಹಕಗಳಾಗಿರುತ್ತಾರೆ. ಈ ರೋಗಕ್ಕೆ ಯಾವುದೇ ನಿರ್ದಿಷ್ಟವಾದ 'ಚಿಕಿತ್ಸೆ' ಇಲ್ಲ
ಎಂಬುದು ಅತಿದೊಡ್ಡ ದುರಂತ. ಒಮ್ಮೆ ವೈರಸ್ ನರಕೋಶಗಳನ್ನು ನಾಶಪಡಿಸಿದರೆ, ಅದನ್ನು ಮರಳಿ ಸರಿಪಡಿಸಲು ವೈದ್ಯಕೀಯ ವಿಜ್ಞಾನಕ್ಕೂ ಸಾಧ್ಯವಿಲ್ಲ. ಈ ಕಾರಣಕ್ಕಾಗಿಯೇ
ಪೋಲಿಯೊವನ್ನು ತಡೆಯುವ ಒಂದೇ ಮಾರ್ಗವೆಂದರೆ 'ಲಸಿಕೆ'. ಕಳೆದ ಶತಮಾನದ ಮಧ್ಯಭಾಗದಲ್ಲಿ, ಪಾರ್ಶ್ವವಾಯುವಿನಿಂದಾಗಿ
ಬದುಕುಳಿದ ಸಾವಿರಾರು ಮಕ್ಕಳು ತಮ್ಮ ಜೀವನಪೂರ್ತಿ ವ್ಹೀಲ್ ಚೇರ್ಗಳನ್ನು ಅವಲಂಬಿಸಬೇಕಾದ
ದೃಶ್ಯಗಳು ಜಗತ್ತಿಗೆ ನರಕ ದರ್ಶನ ಮಾಡಿಸಿದ್ದವು.
ನಲವತ್ತು ವರ್ಷಗಳ ಹಿಂದೆ ನಮ್ಮ ದೇಶದ ಹಳ್ಳಿಗಳಲ್ಲಿ ಪೋಲಿಯೊ
ಪೀಡಿತ ಮಕ್ಕಳನ್ನು ನೋಡುವುದು ಸಾಮಾನ್ಯ ದೃಶ್ಯವಾಗಿತ್ತು. ಸರಿಯಾದ ಸಮಯದಲ್ಲಿ ಲಸಿಕೆ ಸಿಗದೆ, ತಮ್ಮ
ಹರೆಯದಲ್ಲೇ ಕಾಲುಗಳ ಶಕ್ತಿಯನ್ನು ಕಳೆದುಕೊಂಡು ದೈಹಿಕವಾಗಿ ಜಡ್ಡುಗಟ್ಟಿದ ಆ ಮಕ್ಕಳ
ಕಣ್ಣುಗಳಲ್ಲಿನ ದಾರುಣತೆ, ಇಂದಿನ ತಲೆಮಾರಿಗೆ ಕಲ್ಪಿಸಿಕೊಳ್ಳಲೂ
ಸಾಧ್ಯವಿಲ್ಲ. ಅವರ ಕಥೆಗಳು ಆರೋಗ್ಯ ವ್ಯವಸ್ಥೆಯ ವಿಫಲತೆಯ ದ್ಯೋತಕಗಳಾಗಿದ್ದವು.
ವೈದ್ಯಕೀಯ ಜ್ಞಾನ
ಮತ್ತು ಎಚ್ಚರಿಕೆ; ಪೋಲಿಯೊ ಕೇವಲ ಐದು
ವರ್ಷದೊಳಗಿನ ಮಕ್ಕಳನ್ನೇ ಗುರಿಯಾಗಿಟ್ಟುಕೊಳ್ಳುತ್ತದೆ ಎಂಬುದು ವೈದ್ಯಕೀಯ ಸತ್ಯ. ಅಕಾಲಿಕವಾಗಿ
ನರಗಳ ಹಾನಿಗೆ ಒಳಗಾದ ಮಗು, ಮುಂದೆ ದೈಹಿಕವಾಗಿ ಬೆಳೆಯಲು
ಅಶಕ್ತವಾಗುತ್ತದೆ. ಇಲ್ಲಿ ನೈರ್ಮಲ್ಯದ ಅರಿವು ಮತ್ತು ವೈರಸ್ ಹರಡುವ ಸರಪಳಿಯನ್ನು ಮುರಿಯುವುದು
ಬಹಳ ಮುಖ್ಯ. ವೈರಸ್ ಹರಡುವಿಕೆಯನ್ನು ತಡೆಗಟ್ಟಲು ನೈರ್ಮಲ್ಯದೊಂದಿಗೆ ಲಸಿಕೆಯ ಅನಿವಾರ್ಯತೆಯನ್ನು
ನಾವು ಅರ್ಥಮಾಡಿಕೊಳ್ಳಬೇಕಿದೆ.
ವರದಿ:
- ಕಿರಣ್ ದಾನಿ, ಸಂಪಾದಕರು, ರಣಗಲ್ ನ್ಯೂಜ್. © ಸರ್ವ ಹಕ್ಕು ಕಾಯ್ದಿರಿಸಲಾಗಿದೆ.
All Rights Reserved: The complete rights of this column belong to 'RanagalNewz'. Republishing parts or the entirety of this article without prior permission is unlawful. Copyright © 2026